A Grand Celebration of the Birth Anniversary of Lord Rama at the Holy Site of Keshav Shivani. : श्रीक्षेत्र केशव शिवणी येथे श्रीराम जन्मोत्सवाचा दिमाखदार सोहळा कीर्तनमय वातावरणात भाविकांची मोठी गर्दी.
मलकापूर पांग्रा (सिंदखेडराजा): सिंदखेडराजा तालुक्यातील प्रसिद्ध श्रीक्षेत्र केशव शिवणी येथे भगवान श्रीरामांच्या जन्मोत्सवाचा (श्रीराम नवमी) भव्य आणि भक्तिमय सोहळा साजरा करण्यात आला. संपूर्ण गाव धार्मिक उत्साहाने न्हाऊन निघाले असून, केशवराज मंदिर परिसर दिवसभर कीर्तन, भजन, प्रवचन आणि महाप्रसाद यांच्या कार्यक्रमांनी गजबजला होता.
उत्सवानिमित्त आयोजित कार्यक्रमांची मालिका अत्यंत प्रभावशाली ठरली. २५ नोव्हेंबर रोजी ह.भ.प. ज्ञानेश्वर महाराज झगरे गुरुजी यांच्या कीर्तनाने भक्तिरसाची सुरुवात झाली. त्यानंतर ह.भ.प. रमेश महाराज जायभाये यांनी आपल्या सुमधुर वाणीतून श्रीकृष्ण जीवनचरित्र सांगत गोमातेच्या सेवेचा प्रेरणादायी संदेश दिला.
सोहळ्यातील मुख्य आकर्षण ठरले ह.भ.प. प्रेमानंद महाराज देशमुख यांचे ओजस्वी कीर्तन. त्यांनी भगवान श्रीरामांच्या आदर्श जीवनमूल्यांवर प्रकाश टाकत माता-पिता, देश आणि धर्मरक्षणासाठी सर्वांनी सज्ज राहावे, असा प्रभावी आवाहन केले. त्यांच्या कीर्तनाने उपस्थित भाविकांमध्ये नवचैतन्य आणि भक्तिभाव जागृत झाला.
कीर्तनानंतर हजारो भाविकांना महाप्रसादाचे वाटप करण्यात आले. ग्रामस्थांच्या उत्स्फूर्त सहभागामुळे संपूर्ण कार्यक्रम यशस्वी झाला.
या भव्य धार्मिक सोहळ्याचे आयोजन मुर्डेश्वर संस्थानचे अध्यक्ष व केशवराज संस्थानचे विश्वस्त वसंतराव उदावंत बंधू व केशव शिवणी ग्रामस्थांच्या सहकार्याने करण्यात आले. अनेक स्वयंसेवकांनी कार्यक्रम यशस्वी करण्यासाठी अथक परिश्रम घेतले.
मान्यवर उपस्थिती:
कार्यक्रमाला उपविभागीय पोलिस अधिकारी मनीषा कदम, सिंदखेडराजा तहसीलदार अजित दिवटे, किनगाव राजा ठाणेदार मार्तंडकर, डॉ. डी. एस. शिंदे, डॉ. विजयराव नागरे, लोकजागर परिवाराचे विश्वस्त प्रवीण गिते यांसह धार्मिक, सामाजिक, राजकीय आणि शैक्षणिक क्षेत्रातील अनेक मान्यवर उपस्थित होते. यावेळी विविध क्षेत्रात उल्लेखनीय कार्य करणाऱ्या व्यक्तींना विशेष पुरस्कार देऊन गौरवण्यात आले.
मोठ्या संख्येने भाविकांच्या उपस्थितीमुळे केशव शिवणी परिसर “जय श्रीराम… जय श्रीराम” च्या जयघोषांनी दुमदुमून गेला. हा उत्सव भक्ती, एकता आणि सांस्कृतिक वारशाचे सुंदर दर्शन घडवणारा ठरला.
