मतदानाने दारू केली हद्दपार! : Voting bans alcohol!

Voting bans alcohol! :

ब्रह्माच्या महिलांनी बाटली केली आडवी : तरुणींपासून ते वृद्ध महिला मतदानासाठी केंद्रांवर
वाशीम : विधानसभा, लोकसभा, जिल्हा परिषद आणि ग्रामपंचायत निवडणुकीला जसे मतदान होते, अगदी त्याच उत्साहाने ब्रह्मा येथील आडवी केली. महिलांची दुश्मन ठरलेली दारू हद्दपार करण्यासाठी स्वतःच नारीशक्तीने ताकदीने लढा दिला आणि दारूविक्रेत्याविरुद्ध एकीच्या बळाने ही लढाई स्त्रीयांनी जिंकली.
वाशिम जिल्ह्यातील ब्रह्मा या गावात दारूची बाटली भरभरून केलेल्या मतदानातून आडवी झाली. ९ फेब्रुवारीला सकाळी ८ ते सायंकाळी ५ वाजेपर्यंत मतदान प्रक्रिया चालली. तहसीलस्तरावरून मतदान कर्मचारी सकाळीच हजर झाले. सायंकाळीच निकाल जाहीर झाला आणि दारूचा ‘ निकाल ‘ लागला.
दारूमुळे अनेकांचे संसार उद्ध्वस्त झाले. तरुण पिढी दारूच्या नादाला लागून बरबादीच्या वाटेने निघाली. महिलांनी निकराचा लढा देऊन आपले कपाळाचे कुंकू पुसण्यापासून वाचविले. शिवाय उद्याचे देशाचे भविष्य असलेली तरुणाईदेखील या कट्टर रणरागिणींनी सावरली.

दारूविरुद्ध ५२३ मतदान

ब्रह्मा गावात ८१४ महिला मतदारसंख्या आहे. यापैकी ५५३ महिलांनी मतदानाचा हक्क बजावून खऱ्या अर्थाने ताकदीने दारूमुक्तीची चळवळ राबविली. काही वृद्ध महिलांना तर मतदानासाठी चक्क उचलून केंद्रापर्यंत नेण्यात आले. स्वयंस्फूर्तीने महिला मतदानासाठी पुढे आल्या.

१६ मते अवैध
मतदान करताना काही महिलांनी मतदान करताना केलेल्या चुकीमुळे १६ मते अवैध झाली. निकाल लागताच ग्रामस्थांनी एकच जल्लोष साजरा केला.

दारूच्या बाजूने
केवळ १४ महिला

दारूचे दुकान सुरू रहावे, यासाठी १४ महिलांनी मतदान केले. बाकी सर्व मतदान विरुद्ध झाले. त्यामुळे दारू दुकानदाराला आपला गाशा गुंडाळावा लागणार आहे. 

कारवाईचे अधीक्षकांना पत्र

उत्पादन शुल्क अधीक्षकांना पत्र
दारूविरुद्धचा निकाल घोषित झाल्यानंतर निवडणूक नायब तहसीलदार सी.एस. आडे यांनी दारू दुकानावर कारवाई करण्यासाठी पत्र पाठविले आहे.

…………

ADVT