काकाची हत्या करणारा पुतण्या समाधानला जन्मठेप : Nephew Samadhan gets life imprisonment for murdering uncle

बुलढाणा : शेतीच्या वादातून सख्ख्या काकाची हत्या करणाऱ्या कुंबेफळ येथील पुतण्या समाधान जाधव याला येथील प्रमुख जिल्हा व सत्र न्यायालयाचे न्यायाधीश श्रीचंद जगमलानी यांनी जन्मठेपेची शिक्षा सुनावली.

बुलढाणा तालुक्यातील कुंबेफळ येथील मृत शेषराव रामा जाधव (वय ६०) हे २९ ऑक्टोबर २०२२ रोजी शेतात काम करीत होते. त्यांच्या ओरडण्याचा आवाज ऐकल्यानंतर मुलगा विलास जाधव आवाजाच्या दिशेने धावत गेला असता दादाराव पंडित जाधव व आशा साईनाथ बुडगुजर यांनी शेषराव जाधव यांना पकडून ठेवल्याचे व मुख्य आरोपी समाधान पंडित जाधव हा धारदार चाकूने वडिलांच्या पोटात, छातीवर व दोन्ही पायावर वार करताना दिसला. विलासने आरडाओरड केली असता सर्व आरोपी पळून गेले. शेषराव जाधव हे गंभीर जखमी झाले.

आरोपींविरुद्ध खुनाचा गुन्हा सिद्ध होण्यासाठी सरकारी पक्षातर्फे जिल्हा सरकारी वकील वसंत भटकर यांनी नऊ साक्षीदार तपासले. त्यामध्ये फिर्यादी विलास जाधव, घटनास्थळ व जप्ती पंच, डॉ. निवृत्ती देवकर, तपास अधिकारी पोलीस निरीक्षक अनिल पाटील व इतर साक्षीदारांची साक्ष नोंदविण्यात आली. तर घडलेल्या घटनेचे गांभीर्य लक्षात घेत सरकारी पक्षाच्या वतीने आरोपीस जास्तीत जास्त शिक्षा होण्यासाठी ॲड. वसंत भटकर यांनी प्रभावी युक्तीवाद केला. दोन्ही बाजूंचा युक्तीवाद ऐकल्यानंतर प्रमुख जिल्हा व सत्र न्यायाधीश श्रीचंद जगमलानी यांनी आरोपी समाधान जाधव यास जन्मठेपेची शिक्षा ठोठावली. तसेच दहा हजार रुपये दंडाची शिक्षा केली. दंडातील रकमेपैकी आठ हजार रुपये नुकसानभरपाई म्हणून फिर्यादीस देण्याचे आदेश दिले. इतर आरोपींची पुराव्याअभावी निर्दोष सुटका करण्यात आली.

तपास अधिकारी म्हणून पोलीस निरीक्षक अनिल पाटील व कोर्ट पैरवी म्हणून पीएसआय रमेश चव्हाण यांनी सरकार पक्षास मदत केली.