Solapur GNM exam malpractice case heats up : सोलापूर GNM परीक्षा गैरप्रकाराचे प्रकरण तापले! उत्तरपत्रिका तपासणीतील कथित अनियमिततेची उच्चस्तरीय चौकशी करा; नर्सेस फेडरेशनचा इशारा
१० ते १५ हजार विद्यार्थ्यांच्या भवितव्याचा प्रश्न ऐरणीवर; न्याय न मिळाल्यास ३० ऑक्टोबरला राज्यभर एक तास तीव्र निदर्शने
बुलढाणा प्रतिनिधी दि. २९ : सोलापूर येथील GNM (जनरल नर्सिंग अँड मिडवाइफरी) परीक्षेच्या CAP राउंडदरम्यान उत्तरपत्रिका तपासणी प्रक्रियेत कथित अनियमितता झाल्याच्या वृत्तामुळे परिचर्या शिक्षण क्षेत्रात खळबळ उडाली आहे. या प्रकरणाची गंभीर दखल घेत महाराष्ट्र गव्हर्नमेंट नर्सेस फेडरेशनने स्वतंत्र उच्चस्तरीय चौकशीची मागणी केली असून, दोषींवर कठोर कारवाई न झाल्यास ३० ऑक्टोबर २०२६ रोजी राज्यव्यापी तीव्र निदर्शने करण्याचा इशारा दिला आहे.
१० ते १५ हजार विद्यार्थ्यांचे भवितव्य पणाला?
उत्तरपत्रिकांच्या तपासणी प्रक्रियेत पारदर्शकता होती का, उत्तरपत्रिका सुरक्षित ठेवण्याचे नियम पाळण्यात आले का आणि गुणनोंदीत कोणताही फेरफार झाला आहे का, असे गंभीर प्रश्न उपस्थित झाले आहेत. या सर्व बाबींची उपलब्ध पुराव्यांच्या आधारे निष्पक्ष चौकशी करून सत्य जनतेसमोर आणावे, अशी ठाम भूमिका फेडरेशनने घेतली आहे.
या प्रकरणाचा संबंध सुमारे १० ते १५ हजार विद्यार्थ्यांच्या शैक्षणिक भवितव्याशी असल्याचे फेडरेशनने नमूद केले आहे. परीक्षेच्या निकालाबाबत विद्यार्थ्यांच्या मनात शंका निर्माण होणे ही गंभीर बाब असून, संपूर्ण प्रक्रियेची विश्वासार्हता टिकवणे आवश्यक आहे. परिचर्या शिक्षणातून भविष्यातील रुग्णसेवेसाठी प्रशिक्षित मनुष्यबळ तयार होत असल्याने या प्रकरणाकडे शासनाने गांभीर्याने पाहावे, अशी मागणी करण्यात आली आहे.
उत्तरपत्रिकांपासून CCTV फुटेजपर्यंत सर्व नोंदी तपासा!
फेडरेशनने या प्रकरणात सहा प्रमुख मागण्या पुढे केल्या आहेत. त्यामध्ये स्वतंत्र उच्चस्तरीय चौकशी समिती नेमणे, उत्तरपत्रिकांच्या सुरक्षिततेची संपूर्ण प्रक्रिया तपासणे, CCTV चित्रीकरण व वाहतुकीच्या नोंदींची पडताळणी करणे, मूळ उत्तरपत्रिका आणि गुणनोंदींची तपासणी करणे यांचा समावेश आहे.
तसेच कस्टोडियन, सहाय्यक कस्टोडियन आणि संबंधित जबाबदार अधिकाऱ्यांच्या भूमिकेची चौकशी करून दोषींवर कठोर प्रशासकीय व कायदेशीर कारवाई करावी, अशी मागणी करण्यात आली आहे. चौकशी पूर्ण होईपर्यंत सर्व संबंधित उत्तरपत्रिका, डिजिटल नोंदी आणि अन्य पुरावे सुरक्षित ठेवावेत. परीक्षा प्रक्रियेची विश्वासार्हता बाधित झाल्याचे सिद्ध झाल्यास परीक्षा रद्द करून नव्याने परीक्षा घेण्याबाबत निर्णय घ्यावा, तसेच चौकशीचे निष्कर्ष आणि कारवाईची माहिती विद्यार्थ्यांना व जनतेला द्यावी, अशीही मागणी फेडरेशनने केली आहे.
बुलढाणा शाखेचे मंत्र्यांना निवेदन
या प्रकरणी महाराष्ट्र गव्हर्नमेंट नर्सेस असोसिएशन (MGNA), बुलढाणा शाखेच्या वतीने वैद्यकीय शिक्षण मंत्री हसन मुश्रीफ आणि सार्वजनिक आरोग्य मंत्री प्रकाश आबिटकर यांना निवेदन देण्यात आले आहे. जिल्हा कार्यकारिणीच्या अध्यक्ष जयश्री वाघ आणि सचिव मंगेश शिरसाट यांनी हे निवेदन सादर करून प्रकरणाची तातडीने दखल घेण्याची मागणी केली.
३० ऑक्टोबरला राज्यभर एक तास तीव्र निदर्शने
शासनाने या प्रकरणात तातडीने हस्तक्षेप करून योग्य ती कार्यवाही करावी, अन्यथा ३० ऑक्टोबर २०२६ रोजी महाराष्ट्रातील सर्व जिल्हा शाखांमध्ये सकाळच्या सत्रात एक तास तीव्र निदर्शने करण्यात येतील, असा स्पष्ट इशारा फेडरेशनने दिला आहे.
विद्यार्थ्यांना न्याय, दोषींवर कारवाई; निर्दोषांवर अन्याय नको!
या संपूर्ण प्रकरणात कोणत्याही निर्दोष व्यक्तीवर अन्याय होऊ नये; मात्र चौकशीत दोषी आढळणाऱ्यांवर कठोर कारवाई झाली पाहिजे, अशी संघटनेची भूमिका आहे. विद्यार्थ्यांचे शैक्षणिक नुकसान टाळणे, परीक्षेच्या व्यवस्थेवरील विश्वास कायम राखणे आणि परिचर्या शिक्षणाची गुणवत्ता अबाधित ठेवणे यासाठी शासनाने पारदर्शक चौकशी करून ठोस निर्णय घ्यावा, अशी मागणी आता जोर धरत आहे.
आता शासन या मागण्यांवर काय भूमिका घेते आणि चौकशीबाबत कोणती पावले उचलते, याकडे विद्यार्थी, पालक आणि परिचर्या क्षेत्राचे लक्ष लागले आहे.



