बुलढाणा दि १३ : साईबाबांच्या पावन भूमीत, शिर्डी येथील साईबाबा ज्युनिअर कॉलेजमध्ये नुकतीच पार पडलेली चौथी राष्ट्रीय गो चॅम्पियनशिप २०२६-२७ स्पर्धा गो खेळाच्या उत्साहाने भारलेली होती. इंडो ॲमॅच्युअर गो असोसिएशन आणि गो असोसिएशन ऑफ महाराष्ट्र यांच्या संयुक्त विद्यमाने आयोजित या तीन दिवसीय स्पर्धेत देशभरातील १८ राज्यांमधून आलेल्या सुमारे ३०० खेळाडूंनी (ज्युनियर, सब-ज्युनियर आणि सिनियर गट) आपल्या बुद्धिमत्तेचे आणि रणनीतीचे अद्भुत प्रदर्शन केले.
या अटीतटीच्या लढतींमध्ये आंध्र प्रदेशच्या खेळाडूंनी लक्षवेधी कामगिरी करत सर्वाधिक पदकांची कमाई केली आणि प्रतिष्ठेची ‘ओव्हरऑल चॅम्पियनशिप ट्रॉफी’ पटकावली. त्यांच्या या विजयाने गो खेळातील त्यांची पकड पुन्हा एकदा सिद्ध झाली. यजमान महाराष्ट्राच्या संघानेही दमदार खेळ दाखवत उपविजेतेपदाचा मान मिळवला, ज्यामुळे स्थानिक प्रेक्षकांमध्ये उत्साहाचे वातावरण निर्माण झाले.
स्पर्धेच्या समारोप समारंभात सर्व विजेत्या खेळाडूंना आकर्षक ट्रॉफी, पदके आणि प्रमाणपत्र देऊन गौरवण्यात आले. या प्रसंगी इंडो ॲमॅच्युअर गो असोसिएशनचे प्रशासकीय सचिव चंदन पांडे यांनी विजेत्यांचे कौतुक केले आणि त्यांच्या भविष्यातील वाटचालीस शुभेच्छा दिल्या. कार्यक्रमाला कार्यकारी सदस्य डॉ. कुमार, नाशिक विभागीय तांत्रिक अधिकारी गजानन टेकाळे, गो असोसिएशन ऑफ महाराष्ट्रचे सचिव अनिल सहारे, साईबाबा ज्युनिअर कॉलेजचे प्राचार्य संतोष औताडे, फकीरचंद लोढा, डॉ. हाशिम (केरळ), गुलाम फिरोज (तेलंगणा), आंध्र प्रदेशचे सचिव प्रसाद, मध्य प्रदेशचे मनोज बजाज, हरियाणाचे चुनाराम, उत्तर प्रदेशचे अनिमेष, पुडुचेरीचे राजशेखरन, तामिळनाडूचे राजा यांच्यासह अनेक राज्यांचे पदाधिकारी उपस्थित होते. या मान्यवरांच्या उपस्थितीने स्पर्धेची शोभा वाढली.
कार्यक्रमाचे सूत्रसंचालन कुकुडे यांनी अत्यंत प्रभावीपणे केले, तर अनिल सहारे यांनी उपस्थितांचे आभार मानले.
चीनमध्ये भारताचे प्रतिनिधित्व करणार विजेते खेळाडू!
या राष्ट्रीय स्पर्धेतील विजेत्या खेळाडूंसाठी एक अत्यंत रोमांचक संधी वाट पाहत आहे. हे सर्व खेळाडू लवकरच चीनमध्ये होणाऱ्या आंतरराष्ट्रीय गो चॅम्पियनशिपमध्ये भारताचे प्रतिनिधित्व करणार आहेत. ही स्पर्धा त्यांच्यासाठी आंतरराष्ट्रीय स्तरावर आपले कौशल्य दाखवण्याची आणि देशाचे नाव उंचावण्याची सुवर्णसंधी ठरणार आहे. या आंतरराष्ट्रीय स्पर्धेतही भारतीय खेळाडू चमकदार कामगिरी करतील अशी अपेक्षा आहे.
