Two thefts in Mehkar on the same night : मेहकरमध्ये एकाच रात्री दोन ठिकाणी चोऱ्या: सराफा व्यावसायिक आणि मेडिकल स्टोअर लक्ष्य
मेहकर दि ६ : बुलढाणा जिल्ह्यातील मेहकर शहरात एकाच रात्री दोन ठिकाणी झालेल्या चोऱ्यांनी खळबळ उडवून दिली आहे. जुन्या तहसील चौकातील एका सराफा दुकानाला आणि विठ्ठल नगरमधील एका मेडिकल स्टोअरला चोरट्यांनी लक्ष्य केले. या घटनांमुळे स्थानिक व्यावसायिकांमध्ये भीतीचे वातावरण निर्माण झाले असून, पोलिसांच्या कार्यक्षमतेवर प्रश्नचिन्ह निर्माण झाले आहे.
श्रीकृष्ण ज्वेलर्समध्ये ४२ हजारांचा ऐवज लंपास
मिळालेल्या माहितीनुसार, ५ ऑगस्टच्या रात्री ते ६ ऑगस्ट २०२६ च्या सकाळच्या दरम्यान, मेहकर शहरातील तहसील चौक परिसरातील ‘श्रीकृष्ण ज्वेलर्स’ या सराफा दुकानात चोरी झाली. फिर्यादी चंद्रशेखर वसंतराव काटकर (वय ४७, रा. रामनगर, मेहकर) यांनी दिलेल्या तक्रारीनुसार, अज्ञात चोरट्याने त्यांच्या दुकानाचे चॅनल गेटचे लॉक तोडले. त्यानंतर शटरचे दोन्ही बाजूचे लॉक तोडून, सेंटर लॉक वर करून चोरट्याने दुकानात प्रवेश केला. दुकानातील काउंटरमध्ये ठेवलेल्या सुमारे ३९ हजार रुपये किमतीच्या चांदीच्या तोरड्या (अंदाजे ३५० ग्रॅम) आणि ३ हजार रुपये किमतीचा व्हीझन कंपनीचा डीव्हीआर असा एकूण ४२ हजार रुपयांचा मुद्देमाल चोरून नेला.
तहसील चौक असूनही चोरी, पोलिसांच्या गस्तीवर प्रश्नचिन्ह
विशेष म्हणजे, तहसील चौक हा शहरातील एक गजबजलेला परिसर आहे आणि पोलीस स्टेशनपासून काही मिनिटांच्या अंतरावरच आहे. असे असतानाही चोरट्यांनी इतक्या सहजपणे चोरी केल्याने पोलिसांच्या रात्रीच्या गस्तीवर आणि सुरक्षेच्या उपाययोजनांवर गंभीर प्रश्नचिन्ह निर्माण झाले आहे. दुकान मालकांनी चोरी गेलेल्या मालाचे आणि झालेल्या नुकसानीचे एकूण मूल्य दीड लाख रुपयांपर्यंत असल्याचे सांगितले असले तरी, पोलीस स्टेशनमध्ये मात्र ३९ हजार रुपयांची नोंद करण्यात आली आहे.
न्यू गजानन मेडिकल स्टोअरमधूनही रोख रक्कम लंपास
याच रात्री, विठ्ठल नगर, मेहकर येथील दीपक लक्ष्मण गायकवाड यांच्या ‘न्यू गजानन मेडिकल’ स्टोअरलाही चोरट्यांनी लक्ष्य केले. चोरट्यांनी या मेडिकल स्टोअरचे शटर तोडून ड्रॉवरमध्ये ठेवलेली अंदाजे ४ हजार रुपयांची रोख रक्कम चोरून नेली. अशा प्रकारे, एकाच रात्री दोन वेगवेगळ्या ठिकाणी चोऱ्या झाल्याने मेहकर शहरातील कायदा आणि सुव्यवस्थेची स्थिती चिंताजनक बनली आहे.
पोलिसांकडून तपास सुरू
या घटनेची माहिती मिळताच, फिर्यादी चंद्रशेखर काटकर यांच्या तोंडी रिपोर्टवरून मेहकर पोलिसांनी गुन्हा दाखल केला आहे. पुढील तपास बीट सफौ राजेंद्र काळे (ब.नं. ९०२) यांच्याकडे सोपवण्यात आला आहे. फिंगरप्रिंट्स तज्ञांनी घटनास्थळी भेट देऊन तपास केला असून, मेहकर पोलीस या प्रकरणाचा अधिक तपास करत आहेत. या चोऱ्यांमुळे सराफा व्यावसायिक आणि इतर दुकानदारांमध्ये भीतीचे वातावरण पसरले असून, पोलिसांनी तातडीने या चोरट्यांना पकडून कठोर कारवाई करावी, अशी मागणी नागरिकांकडून होत आहे.
