Buldana District’s Earnest Plea: A Demand for State-Level Representation from Ramdas Athawale : बुलडाणा जिल्ह्याची आर्त हाक रामदास आठवले यांच्याकडून राज्यस्तरीय प्रतिनिधीत्वाची मागणी
बुलडाणा, महाराष्ट्र :– रिपब्लिकन पार्टी ऑफ इंडिया (आठवले गट) च्या बुलडाणा जिल्हा शाखेने, जिल्हा संपर्क प्रमुख पत्रकार बाबासाहेब जाधव यांच्या नेतृत्वाखाली, पक्षाचे राष्ट्रीय अध्यक्ष आणि केंद्रीय सामाजिक न्याय राज्यमंत्री डॉ. रामदासजी आठवले यांच्याकडे एक महत्त्वपूर्ण मागणी केली आहे. बुलडाणा जिल्ह्याला राज्य पातळीवर सत्तेचे प्रतिनिधित्व मिळावे, अशी ही मागणी आहे, जी अनेक वर्षांच्या प्रतीक्षेनंतर आता अधिक तीव्र झाली आहे.
गेली पंधरा वर्षे, आणि त्यापूर्वीपासूनही, रिपब्लिकन पार्टी ऑफ इंडिया (आठवले गट) महायुतीचा अविभाज्य भाग राहिली आहे. “जिथे डॉ. रामदासजी आठवले, तिथे सत्ता” हे चित्र संपूर्ण देशाने पाहिले आहे. डॉ. आठवले यांनी महाराष्ट्रातील अनेक जिल्ह्यांना सत्तेत स्थान दिले असले तरी, बुलडाणा जिल्ह्याला मात्र राज्य पातळीवरील एकही महत्त्वाचे पद मिळालेले नाही, अशी खंत कार्यकर्त्यांनी व्यक्त केली आहे. त्यामुळे, या वेळी बुलडाणा जिल्ह्याचा विचार व्हावा, अशी विनंतीवजा मागणी जिल्ह्यातील एकनिष्ठ कार्यकर्त्यांनी केली आहे.
बुलडाणा जिल्ह्याची ओळख आंबेडकरी चळवळीचा बालेकिल्ला म्हणून आहे. डॉ. बाबासाहेब आंबेडकर यांच्या सामाजिक-राजकीय चळवळीची मुळे या भूमीत खोलवर रुजलेली आहेत. बळीरामजी बोर्डे, त्यागमुर्ती नागोरावजी जाधव, गोपाळराव जाधव, जाणूजी घुमरे, सुखदेवराव जाधव, म.ज. गव्हांदे, सु.स. इंगळे, एल. बी. वानखेडे, अ.मो. तेलंग, दत्ता हिवाळे यांसारख्या अनेक दिग्गजांनी या चळवळीला बळ दिले. आजही या मातीत आंबेडकरी विचार जिवंत आहे आणि डॉ. रामदासजी आठवले यांच्याशी एकनिष्ठ कार्यकर्ते मोठ्या संख्येने आहेत. स्मृतीशेष देविदासजी साबळे यांच्या नेतृत्वाखाली 1976 पासून बुलडाणा जिल्हा डॉ. आठवले यांच्या पाठीशी खंबीरपणे उभा आहे. नामांतर चळवळीची आग याच भूमीत धगधगली आणि आजही “जीव गेला तरी चालेल, पण मरतानाही डॉ. रामदासजी आठवले जिंदाबाद” म्हणणारे कार्यकर्ते येथे आहेत. “मोडेल पण वाकणार नाही” या म्हणीप्रमाणे हे कार्यकर्ते डॉ. आठवले यांच्यावर जीवापाड प्रेम करतात, सत्ता असो वा नसो.
गेल्या तीस वर्षांपासून रिपब्लिकन पार्टी ऑफ इंडिया सत्तेत असली तरी, या काळात बुलडाणा जिल्ह्याला कोणतेही छोटे-मोठे सत्तेचे पद मिळाले नाही, ही कार्यकर्त्यांची प्रमुख तक्रार आहे. त्यामुळे, या वेळी महायुतीकडून बुलडाणा जिल्ह्यातील कोणत्याही एका कार्यकर्त्याला राज्य पातळीवरचे सत्तेचे पद मिळावे, अशी मागणी जिल्हा संपर्क प्रमुख पत्रकार बाबासाहेब जाधव, जिल्हाध्यक्ष भाऊसाहेब सरदार, ज्येष्ठ नेते भैयासाहेब पाटील, युवाध्यक्ष प्रकाश पाटील (म्हस्के), महिला जिल्हाध्यक्षा वंदनाताई वाघ, जिल्हा संघटन संपर्क प्रमुख इंजि. शरद खरात, विदर्भ महिला उपाध्यक्षा आशाताई वानखेडे, मराठा नेते रामभाऊ शिंदे, विदर्भ उपाध्यक्ष रामेश्वरी वाकोडे, संजयजी वाकोडे, दलितमित्र विजयराज सपकाळ, जिल्हा अल्पसंख्याक प्रमुख नबाब मिर्झा बेग, जिल्हा उपाध्यक्ष भाऊसाहेब वानखडे, इंजि. राजेश सरकटे, भगवानराव इंगळे, इंजि. भास्करराव जाधव, कार्याध्यक्ष प्रा. मुक्तार पठाण सर, प्रसिद्धी प्रमुख वैभव शिरसाठ, माजी युवाध्यक्ष विजय पवार, महासचिव निळकंठ दादा सोनोने, विजय देविदास साबळे, महिला नेत्या कल्पनाताई साबळे, महिला अध्यक्षा रोहिणीताई कबीरदास, अल्पसंख्याक आघाडी उपप्रमुख सैय्यद, तसेच सर्व तालुकाध्यक्ष आणि इतर प्रमुख पदाधिकारी व कार्यकर्त्यांनी प्रसिद्धीपत्रकाद्वारे केली आहे.
आणखी बातमी वाचण्यासाठी खालील लिंक ला क्लिक करा http://mahadesha.com/
बुलडाणा जिल्हा, जो आंबेडकरी चळवळीचा ऐतिहासिक वारसा जपतो आणि डॉ. रामदासजी आठवले यांच्याशी अतूट निष्ठा बाळगतो, तो आता आपल्या नेत्याकडून न्याय आणि प्रतिनिधित्व मिळण्याची अपेक्षा करत आहे. केंद्रीय मंत्री डॉ. रामदासजी आठवले यांच्याकडून या मागणीवर सकारात्मक विचार होईल, अशी आशा संपूर्ण जिल्ह्याला आहे.
