Medicity Revolution in Maharashtra : महाराष्ट्रात ‘मेडिसिटी’ क्रांती: जागतिक दर्जाची आरोग्यसेवा परिसंस्था प्रत्यक्षात येणार
क्लीव्हलँड, ओहायो 10 : महाराष्ट्राच्या भूमीवर आरोग्यसेवेच्या एका नव्या युगाची पहाट होत आहे. मुख्यमंत्री देवेंद्र फडणवीस यांच्या दूरदृष्टीने आणि पंतप्रधान नरेंद्र मोदी यांच्या ‘हील इन इंडिया’ संकल्पनेला अनुसरून, ‘मेडिसिटी’ या जागतिक दर्जाच्या आरोग्यसेवा परिसंस्थेची संकल्पना आता प्रत्यक्षात येणार आहे. रुग्णसेवा, वैद्यकीय शिक्षण, संशोधन, नवोन्मेष आणि प्रतिभेला एकाच छताखाली आणणारी ही महत्त्वाकांक्षी योजना, भारताच्या आरोग्य क्षेत्राला आंतरराष्ट्रीय स्तरावर घेऊन जाईल, असा विश्वास मुख्यमंत्री देवेंद्र फडणवीस यांनी व्यक्त केला आहे.
या ऐतिहासिक प्रवासाची सुरुवात क्लीव्हलँड, ओहायो येथे झाली, जिथे महाराष्ट्र शासन, क्लीव्हलँड क्लिनिक (CC), ब्रुकफिल्ड ॲसेट मॅनेजमेंट आणि आरोधन हेल्थ सिटी (AHC) यांच्यात नवी मुंबई इंटरनॅशनल मेडिसिटी (NMIMC) विकसित करण्यासाठी सामंजस्य करार (MoU) करण्यात आला. मुंबईहून व्हिडिओ कॉन्फरन्सिंगद्वारे या सोहळ्यात सहभागी होताना मुख्यमंत्री फडणवीस यांनी या भागीदारीचे महत्त्व अधोरेखित केले. त्यांच्यासोबत वरिष्ठ शासकीय अधिकारी तसेच ब्रुकफिल्ड आणि एएचसीचे प्रतिनिधीही उपस्थित होते, तर क्लीव्हलँड क्लिनिकच्या मुख्यालयात मुख्यमंत्र्यांचे गुंतवणूक सल्लागार कौस्तुभ धवसे यांनी महाराष्ट्र शासनाचे प्रतिनिधित्व केले.
क्लीव्हलँड क्लिनिकचे मुख्य कार्यकारी अधिकारी डॉ. टोमिस्लाव मिहाल्जेविक, डॉ. समीर कपाडिया (अध्यक्ष, कार्डिओव्हॅस्क्युलर मेडिसिन), डॉ. फाल्कोने (अध्यक्ष, इमर्जिंग मार्केट्स) आणि आर्सेलर मित्तलचे कार्यकारी अध्यक्ष तसेच क्लीव्हलँड क्लिनिकचे संचालक मंडळ सदस्य श्री. लक्ष्मी मित्तल यांच्या उपस्थितीत हा करार संपन्न झाला. आरोधन हेल्थ सिटीच्या डॉ. सलोनी पटवर्धन यांनीही या प्रसंगी आपली उपस्थिती दर्शविली.
मुख्यमंत्री फडणवीस यांनी या भागीदारीला भारतातील आरोग्य सेवा क्षेत्रातील परिवर्तनकारी प्रवासाची सुरुवात असे संबोधले. “जगातील सर्वात प्रतिष्ठित आरोग्य संस्थांपैकी एक असलेल्या क्लीव्हलँड क्लिनिकने महाराष्ट्रासोबत या उपक्रमात भागीदारी करण्याचा निर्णय घेतल्याचा आम्हाला अभिमान आहे,” असे ते म्हणाले. डॉ. मिहाल्जेविक यांच्या नेतृत्वाखालील क्लीव्हलँड क्लिनिकच्या नेतृत्वाचे, विशेषतः डॉ. समीर कपाडिया आणि लक्ष्मी मित्तल यांचे त्यांनी या उपक्रमाला पुढे नेण्यासाठी आभार मानले.
नवी मुंबई इंटरनॅशनल मेडिसिटी: एक दूरदृष्टी प्रकल्प
भारताचे पहिले जागतिक स्तरावरील आरोग्य सेवा, संशोधन, वैद्यकीय शिक्षण आणि वैद्यकीय पर्यटन केंद्र म्हणून संकल्पित करण्यात आलेली नवी मुंबई इंटरनॅशनल मेडिसिटी, नवी मुंबई आंतरराष्ट्रीय विमानतळालगत सुमारे 250 एकर क्षेत्रावर विकसित केली जाईल. हा प्रकल्प केवळ आरोग्य सेवा पुरवण्यापुरता मर्यादित नसून, एक व्यापक परिसंस्था उभारण्याचे उद्दिष्ट ठेवतो. यामध्ये जागतिक दर्जाची रुग्णालये, वैद्यकीय आणि परिचारिका शिक्षण संस्था, क्लिनिकल संशोधन केंद्रे, जैवतंत्रज्ञान आणि जीवन विज्ञान सुविधा, कृत्रिम बुद्धिमत्ता आधारित आरोग्य सेवा नवोन्मेष, वेलनेस पायाभूत सुविधा आणि संबंधित आरोग्य सेवा एकाच सहयोगी कॅम्पसमध्ये विकसित करण्यात येणार आहेत.
या प्रकल्पामुळे सुमारे 1.2 अब्ज अमेरिकी डॉलरची गुंतवणूक आकर्षित होण्याची आणि 10,000 हून अधिक थेट रोजगार निर्माण होण्याची अपेक्षा आहे, ज्यामुळे राज्याच्या आर्थिक विकासालाही गती मिळेल. क्लीव्हलँड क्लिनिक या प्रकल्पाची प्रमुख संस्था म्हणून कार्य करेल, ज्यामुळे अत्युच्च दर्जाची आरोग्य सेवा, वैद्यकीय शिक्षण, संशोधन, नवोन्मेष आणि रुग्णकेंद्रित आरोग्य सेवा पुरविण्यातील त्यांचा जागतिक अनुभव या प्रकल्पाला मिळेल.
नवोन्मेष आणि संशोधनाचे केंद्र
मेडिसिटीभोवती विकसित होणाऱ्या व्यापक नवोन्मेष परिसंस्थेचा भाग म्हणून, लक्ष्मी एन. मित्तल यांनी स्थापन केलेल्या एलएनएमआयआयटी, जयपूरने क्लीव्हलँड क्लिनिक आणि एनएमआयएमसीसोबत संशोधन पायाभूत सुविधा, प्रगत तंत्रज्ञान क्षमता आणि शैक्षणिक कौशल्य उपलब्ध करून अत्याधुनिक आरोग्य सेवा नवोन्मेष, ट्रान्सलेशनल रिसर्च, कृत्रिम बुद्धिमत्ता आणि प्रिसिजन मेडिसिन उपक्रमांना पाठबळ देण्यासाठी सहकार्य करण्याची तयारी दर्शविली आहे. हे सहकार्य आरोग्य क्षेत्रातील संशोधनाला नवी दिशा देईल.
क्लीव्हलँड क्लिनिकचे मुख्य कार्यकारी अधिकारी आणि अध्यक्ष डॉ. टॉम मिहाल्जेविक यांनी या भागीदारीबद्दल उत्साह व्यक्त केला. “एनएमआयएमसी हा भविष्यातील रुग्ण, आरोग्य व्यावसायिक आणि संशोधकांच्या गरजा पूर्ण करणाऱ्या दूरदर्शी आरोग्य परिसंस्थेत आमचे कौशल्य योगदान देण्याची संधी आहे,” असे ते म्हणाले. ब्रुकफिल्डचे व्यवस्थापकीय भागीदार अंकुर गुप्ता यांनीही या प्रकल्पाला “मोठ्या प्रमाणावर आर्थिक आणि सामाजिक परिणाम घडवून आणणारी पायाभूत सुविधा उभारण्याची एक अद्वितीय संधी” असे संबोधले.
आरोधन हेल्थ सिटीच्या संस्थापक आणि संचालक डॉ. सलोनी पटवर्धन यांनी “जगातील सर्वोत्तम संस्थांना एकत्र आणून एकात्मिक आरोग्य सेवा परिसंस्था निर्माण करणे” हे आपले ध्येय असल्याचे सांगितले आणि हा करार त्या ध्येयाच्या दिशेने एक मोठे पाऊल असल्याचे नमूद केले.
महाराष्ट्र शासन या भागीदारीसाठी आवश्यक सहकार्य करेल, तसेच लागू असलेल्या धोरणे आणि नियमांनुसार आवश्यक मंजुरी आणि परवानग्या मिळविण्यासाठी या समूहाला मदत करेल. नवी मुंबई इंटरनॅशनल मेडिसिटी हा केवळ एक प्रकल्प नसून, महाराष्ट्राच्या आरोग्य क्षेत्राला जागतिक नकाशावर आणणारा एक परिवर्तनकारी उपक्रम आहे, जो भविष्यातील पिढ्यांसाठी आरोग्य, शिक्षण आणि रोजगाराच्या संधींची कवाडे उघडेल.
